கால்பந்து மான்செஸ்டர் யுனைடெட் வெற்றி

லண்டன்: சவுத்தாம்டன் அணிக்கு எதிரான பிரிமியர் லீக் கால்பந்து போட்டியில் மான்செஸ்டர் யுனைடெட் அணி வெற்றி பெற்றது.

இங்கிலாந்தில் பிரிமியர் லீக் கால்பந்து தொடர் நடக்கிறது. இதன் லீக் போட்டியில்
மான்செஸ்டர் யுனைடெட், சவுத்தாம்டன் அணிகள் மோதின. போட்டியின் துவக்கத்தில் அசத்திய
சவுத்தாம்டன் அணிக்கு ஜே ரோட்ரிக்ஸ் (3வது நிமிடம்) ஒரு கோல் அடித்தார். இதற்கு மான்செஸ்டர்
யுனைடெட் அணியின் ரூனே (8, 27) இரட்டை அடி கொடுத்தார். 

பின் இரண்டாவது பாதியில் இரு அணி வீரர்களும் கோல் ஏதும் அடிக்கவில்லை. முடிவில், மான்செஸ்டர் யுனைடெட் அணி 2-1 என வெற்றி பெற்றது. 

பிற போட்டிகளில் புல்ஹாம், வெஸ்ட்ஹாம் யுனைடெட் அணியை 3-1 என வீழ்த்தியது. வெஸ்ட் பிரவுன்விச், எவர்டான் அணியிடம் 2-1 என தோல்வியடைந்தது. ஆர்சனல், லிவர்பூல் அணிகள் மோதிய போட்டி 2-2 என "டிரா' ஆனது. ரீடிங், செல்சியா அணிகள் மோதிய மற்றொரு போட்டியும் 2-2 என "டிராவில்' முடிந்தது. தவிர, நார்விச் சிட்டி, டாட்டன்ஹாம் அணிகள் மோதிய போட்டியும் 1-1 என "டிரா' ஆனது.

இதுவரை 24 லீக் சுற்று போட்டிகள் முடிந்த நிலையில், மான்செஸ்டர் யுனைடெட் (59 புள்ளி) முதலிடத்தில் உள்ளது. இரண்டாவது இடத்தில் மான்செஸ்டர் சிட்டி (52), மூன்றாவது இடத்தில் செல்சியா (46) உள்ளது.